Militärhilfe
für Kurden ?!.کوردلره سیلاح یاردیمی ؟!
.
Kurdlərə silah yardımı?!
سون آیلاردا
عراق دا باش وئره ن حادیثه لر بوش حاکمییتی نین منطقه ده یالنیش سیاستی و
عراغا موداخیله سی نین نتیجه سیدیر. ائله جه ده اوچ ایلده ن به ری سورییه
ده اسدین قان توکمه سینه گوز یومولماسیدیر. آمئریکانین کئچمیش
حاکمیتی عراقدا حوکومت ایستوروکتورونو آلت اوست ائتمه سی نین
سونوجودور.یوز ایللرجه بیرلیکده یاشایان سونی ـ شیعه داواسی نین
سالینماسیدیر. او تاریخده ن بویانا اون مینلرجه اینسان تئروریست
حرکتلرین قوربانی اولموشدور. عراق حوکومتی ایسه تئهران رئژیمی نین قویروغو
اولاراق، شیعه مذهبینده اولانلارا اوستونلوک وئریب، قوم
شهرینده بئجه دیکلری صدری و اونون دار دسته ینی لوبناندا حزب
الله کیمی اورقانیزه ائتمه یه چالیشمیشدیر. بئله لیکله عملده اولکه
نفوذونون بویوک بیر حیصه سی(سونیلر) حاکمییت دن اوزاقلاشدیریلمیشدیر.
عملده
عراغا موداخیله دن بویانا، عرقدا دوغرو ـ دوزگون بوتون عراغی تمثیل
ائده ن،بوتون اولکه یه حاکیم اولان، بیر حوکومت یوخدور. بو بوشلوق نتیجه
سینده ، یوخاریدا کورد لر غربین حمایه سینه دایاناراق ، تورکمن اهالی نین
اراضیلرینه صاحیب چیخیب ،حتا تورکمن شهری اولان کرکوکو ایسه اوزلری ینکی
حئساب ائتمه یه قالخمیشلار.
سون آیلاردا عراقداکی حوکومت
بحرانیندان، سورییه ده بئجه ردیله ن تئرورچو دسته لر
عراغا گیریب ، وحشی جه سینه اونلار کیمی دوشونمه ینلری قیرماغا
باشلامیشلار. یزیدیلر بو ایشین قوربانینا چئوریلمیشلر. کوردلره قارشی
تهلوکه آرتیقدا، آمئریکالیلار موداخیله ائدیب کوردلری بو ساواشدا
حمایت ائتمه یه باشلامیشلار.، آوروپا بیرلی ییده حمایه قرارینا
گلمیش، اینگیلیسلر ، فرانسالیلار و حتا آلمانلیلار دا کوردلره سیلاح
وئرمه قرارینا گلمیشلر. طبیعی اولاراق بیر میللت تهلوکه ایله
اوز ـ اوزه گلدیکده ، یئنی بیر سوی قیریمی نین قارشی سینی آلماق
اوچون، یاردیم ائدیلمه سی لازیمدیر. بیر صورتده کی، اوچ ایلده
ن به ر ی اسده قارشی کیمسه عملی یاردیم ائدیلمیر، اودا راحاتجاسینا
میللتی قیرماغا دوام ائدیر. آوروپا ایسه آنجاق اونلارین مسیحی قاچقینلارینا
اوز اولکه لرینده سیغیناجاق وئریر.
آمما کوردلره سلاح وئرمه یه
گلدیکده، بئله بیر سوال اورتایا چیخیر . آیا بو سیلاحلار صاباح آیری
مقصدله ایستیفاده اولونا بیلمه زمی؟ بوگون حمایه اولونماسی گره کن
کوردلر،صاباح باشقا میللتلرین اراضیلرینی سیلاح گوجونه منیمسه یه
بیلمه زلر می؟!
چونکی اونلار هنوز مستقیل اولمادان، گونئی
آذربایجانین یاریسینی، اوز خاریتالارینا داخیل ائدیب ،اراضی ایدعاسینا
قالخمیشلار. بیزه گوره آمئریکا و غربیلی لر بو سیلاحلاری وئردیکده ،
بو سیلاحلارین باشقا مقصدله یارارلانیلماماسینی بیلدیریب، بیر موقاویله
ایله کوردلردن ایلتیزام آلمالاری گره کیردی. چونکی عملده آمئریکانین عراق
اوردوسونا باغیشلادیغی سون مودئل سیلاحلارا، بوگون تئروریست
ایسلامچیلار صاحیب چیخمیشلار. بو دفعه آمئریکالیلار اوزلری نین باغیشلادیغی
سیلاحلاری بومبالاماق زوروندادیرلار.
بو منطقه آغیر بیر
بحران ایچینده دیر. خاریتایا نظر سالدیقدا (افغانیستان، پاکیستان ، سعودی
عربیستان، بحرین، ایران ، تورکیه، عراق ، سوذرییه ) بو اولکه لرین وضعی
ثابیت دورومدا دئییلدیر. صاباح نه اولاجاغی دا بللی دئییلدیر. بئله
بیر آلیشما حالیندا اولان بیر اودا بنزین توکمک، دوزگون حرکت ساییلا
بیله رمی ؟
بیزه گوره بوگون کوردلره یاردیم ائتمک لازیم
اولسادا، بو شرط ـ شروطونان اولمالیدیر. چونکی منطقه ده اولان سرحدلرین
عومرو اوزون اولمایاجاقدیر. او زامان بو سیلاحلارین آیری مقصدلرله
ایستیفاده اولونماسی نین قارشی سی ایندیده ن آلینمالیدیر.
آنادیلی غزئتی23.8.14